ស្នងការរាជធានីភ្នំពេញ ៖ តំបន់ក្រហម តំបន់លឿងទុំ និងតំបន់លឿងសមត្ថកិច្ចចម្រុះតែងចេញល្បាតជាប្រចាំ ២៤ម៉/២៤ម៉
ភ្នំពេញ ៖ អគ្គស្នងការងនិងជាស្នងការនគរបាលរាជធានីភ្នំពេញលោក ស ថេត នៅថ្ងៃទី៣០ ខែមេសា ឆ្នាំ២០២១នេះ បានសរសេរលើទំព័រហ្វេសបុកថា ក្នុងរយ:ពេលនៃការអនុវត្តវិធានការបិទខ្ទប់ ចាប់តាំងពីថ្ងៃទី១៥ ខែមេសា ឆ្នាំ២០២១មក សង្កេតឃេីញថាមានប្រជាពលរដ្ឋជាច្រេីនបានចូលរួមសហការ និងអនុវត្តតាមវិធានការនេះ ។ ដោយស្ថានភាពឆ្លងរាលដាលមិនទាន់មានការថមថយ រាជរដ្ឋាភិបាលបានសម្រេចបន្តការបិទខ្ទប់៧ថ្ងៃទៀតរហូតដល់ថ្ងៃទី០៥ ខែឧសភា ឆ្នាំ២០២១ ហេីយសាលារាជធានីភ្នំពេញ ក៏បានចេញសេចក្តីសម្រេចអំពីការបែងចែកជា៣តំបន់ផ្សេងគ្នា តំបន់ក្រហម តំបន់លឿងទុំ និងតំបន់លឿង ។
លោក ស ថេត បន្ថែមទៀតថា ទោះជាយ៉ាងណានៅមានប្រជាពលរដ្ឋមួយចំនួនតូចរស់នៅតំបន់ក្រហម និងតំបន់លឿងទុំ ដែលមិនចូលរួមសហការ និងមិនគោរពតាមការណែនាំរបស់សាលារាជធានីភ្នំពេញ ស្របពេលដែលពលរដ្ឋភាគច្រេីនបានចូលរួមសហការ និងគោរពបានយ៉ាងល្អតាមការណែនាំ ដេីម្បីបង្ការ និងទប់ស្កាត់ការឆ្លងរាលដាលវីរុសកូវីដ១៩ ។
ស្នងការនគរបាលរាជធានីភ្នំពេញលោក ស ថេត បានសំណូមពរប្រជាពលរដ្ឋដែលរស់នៅតំបន់ក្រហម និងតំបន់លឿងទុំ ជួយរាយការណ៍ និងផ្តល់ព័ត៌មានមកស្នងការដ្ឋាននគរបាលរាជធានីភ្នំពេញ ចំពោះប្រជាពលរដ្ឋមួយចំនួនតូចដែលនៅតែល្មេីសនឹងវិធានការនេះ ដេីម្បីចាត់ការតាមវិធានការច្បាប់ ។
លោក ស ថេត បានបញ្ជាក់ថាទាំងតំបន់ក្រហម តំបន់លឿងទុំ និងតំបន់លឿង សមត្ថកិច្ចចម្រុះនៃស្នងការដ្ឋាននគរបាលរាជធានីភ្នំពេញ តែងតែចេញល្បាតជាប្រចាំ ២៤ម៉/២៤ម៉ ទាំងតាមផ្លូវធំ និងផ្លូវតូច ៕
